PNG PM Peter O'Neill imas stretim SABL promis

Picture: Ol bagarap em logging i kamapim long PNG 

Source: Radio Australia

Papua New Guinea Praim Minista Peter O'Neill imas bihaenim promis blong en long rausim ol Special Agrikalsa bisnis leases emi bin mekim long stat blong despla yia.

Despla em askim blong wanpla papa graon blong Pomio Distrik long East New Britain provins, Paul Tavol husat itok planti foran kampani iwokbung wantem sampla gavman ofisa long stilim nating graon blong ol pipal long ples.

Gavman ibin oraetim despla special agrikalsa bisnis leases blong larim ol bisnis kampani long leasim graon inap klostu 100 yiar long planim Oil Palm.

Tasol Mr Pavol itok despla kaen taem emi longpla tumas na ol pipal blong en bai isuim wonem hap graon long laif blong ol.

Mr Pavol i askim tu Praim Minista, blong wonem na oli lus tingting long ol pipal blong Pomio.

Emi tok ol pipal blong Pomio i wari tru long wonem komisin blong enkuairi igo long SABL ino bin tokaut oa putim wari blong ol long ol ripot em oli bin kamapim bihaenim despla wok painimaut igo long Special Agrikalsa bisnis lisas.